ისრაელის ჩრდილოეთ ოლქში, ხაიფის რაიონში მოღვაწე ცნობილი ქორეოგრაფი, ქალაქ კირიათ ბიალიკის საკრებულოს წევრი, წლების განმავლობაში კულტურის, სპორტისა და ახალგაზრდობის დეპარტამენტის უფროსი, ისრაელში ქართული მუსიკალურ-ქორეოგრაფიული ანსამბლების დამაარსებელი და დღემდე უცვლელი სამხატვრო ხელმძღვანელი, ქალაქების - კირიათ ბიალიკის (ისრაელი) და ზესტაფონის (საქართველო) ,,საპატიო მოქალაქე’’ , ფაზისის აკადემიის საპატიო აკადემიკოსი, ,,ღირსების ორდენის’’ კავალერი, კულტურის დამსახურებული მოღვაწე, ბატონი შოთა წვენიაშვილი.
10 ოქტომბერს დელეგაცია მიიღო თბილისის მერის მოადგილემ ალეკო მარგიშვილმა. სტუმრებთან ერთად მიღებაზე ვიყავით: ქართულ-ებრაული მეგობრობის 26 საუკუნოვანი იუბილის მოსამზადებელი სამთავრობო კომისიის თანათავმჯდომარე ჯამლეტ ხუხაშვილი, ქალაქ ზესტაფონის წარმომადგენლები თეიმურაზ ცერცვაძე, ვახტანგ ღამბაშიძე, ომარ გველესიანი და ჟურნალისტი ლეილა ნოდია. შეხვედრამ საქმიან ვითარებაში ჩაიარა. სტუმრებმა თბილისის მერიას ცხრასანთლიანი ხანუქია უსახსოვრეს.
დილით დელეგაციის წევრებმა თბილისის დიდი სინაგოგა, ბააზოვის სახელობის ებრაელთა მუზეუმი, თბილისის ღირშესანიშნაობები მოიარეს.
მერიიდან სტუმრებმა საქართველოს კულტურისა და ძეგლთა დაცვის სამინისტროში გადაინაცვლეს, სადაც მათ მინისტრი მიხეილ გიორგაძე, მინისტრის მოადგილეები კახა კანდელაკი და ლევან ხარატიშვილი თბილისის ქართველ და ებრაელ ინტელიგენციასთან ერთად გულთბილად შეხვდნენ. ამ შეხვედრაზე ბატონ შოთას უამრავი სიურპრიზი ელოდა. მათ შორის: საქართველოს ქორეოგრაფიულ მოღვაწეთა კავშირის სახელით კოლეგას მიესალმნენ და ''ქორეოგრაფიის რაინდის ორდენი'' გადასცეს კავშირის თავმჯდომარის მოადგილეებმა - ოლეგ ალავიძემ, იური ტორაძემ, გელოდი ფოცხიშვილმა და აუდიტ-სერვის '' BAFI'' - ს გენერალურმა დირექტორმა თეიმურაზ ცერცვაძემ.
ორგანიზაცია ''საქართველო - ისრაელის'' პრეზიდენტმა მეირ შავიტმა საკუთარი დიზაინით შექმნილი უნიკალური სკულპტურა, ორი მოცეკვავე ბიჭით, რომლებსაც ხელში ფარი და ხმალი უჭირავთ და მოოქროვილი წარწერებიც ამშვენებს, უსახსოვრა ორი ერის კულტურის დესპანს შოთა წვენიაშვილს.
საერთაშორისო ორგანიზაცია ''სახალხო დიპლომატიის'' პრეზიდენტმა ნინო ანდრონიკაშვილმა ამაგდარ ქორეოგრაფს შოთა წვენიაშვილს ''სახალხო სიყვარულის და მეგობრობის'' სამახსოვრო საჩუქარი და საპატიო სიგელი გადასცა